“Гүнээсээ хайрлая” 2025–Усны шилдэг шийдлүүд шалгарлаа

“Оюу толгой” компанийн санаачилгаар хэрэгжиж буй “Гүнээсээ хайрлая” усны мэдээллийн аян дөрөв дэх жилдээ үргэлжилж байна.

Энэ хүрээнд хоёр дахь жилдээ зохион байгуулагдаж буй усны шилдэг шийдэл шалгаруулах уралдааны шагнал гардуулах ёслол гуравдугаар сарын 21-ний болж өндөрлөлөө.

Шилдэг шийдлүүд:

Шилдэг байгууллага – “Дуртмал ус” ХХК

Монгол орны байгалийн эрдэс түүхий эдэд түшиглэн бохир ус цэвэрлэх MJ-B коагулянт бодисыг Монголд анх удаа гарган авч туршилт, судалгааны ажлуудыг гүйцэтгэж байна.

Шилдэг иргэн – Д.Батдорж

2021-2024 онд нийт 14,000 литр орчим хур борооны ус тосож хуримтлуулан цэвэр усаа хэмнэжээ. Мөн Говь-Сүмбэр аймагт уурхайн шүүрлийн хаягдал усыг өөрийн санаачлагаар дахин ашиглаж, тарьж буй модоо усалж байгаа юм байна. Түүнээс гадна компост машин ашиглаж өрхийн хэрэглээний хог хаягдлаа багасган, ус хэмнэлтийн тэмдэглэл хөтлөх, Сэлбэ голын эрэг дагуу хогийг цэвэрлэх зэргээр өдөр тутмын амьдралдаа хүрээлэн буй орчиноо хайрлан, хамгаалах зуршлыг хэвшүүлсэн аж.

Шилдэг судлаач – Ш.Чулуунбаатар

2000 оноос хойш хийгдсэн гидрогеологийн судалгааны үр дүнг нэгтгэн бүсийн шинжтэй мэдээллийг Говийн 3 сав газрыг хамруулан “Гидрогеологийн тэмдэглэл”, “Алтайн өвөр говь сав газрын газар доорх усны тархалт бүрдэлтийн зүй тогтол”, “Умард Говь, Дундад Халхын өндөрлөгийн гидрогеологи” гэсэн 3 товхимлоор гаргасан.

Шалгарсан бүх оролцогчдын маань санаачилга, судалгаа, технологийн шинэчлэл нь Монгол Улсын усны нөөцийг хамгаалах, тогтвортой ашиглахад үнэтэй хувь нэмэр оруулж байна.

“Гүнээсээ хайрлая” аян нь усны нөөцийг хамгаалах, зохистой хэрэглээ, дахин ашиглалтыг сурталчлах, газрын доорх усны ач холбогдлыг олон нийтэд таниулах, гидрогеологийн чиглэлээр мэргэжилтэн бэлтгэхэд хувь нэмрээ оруулсаар байгаа юм.

Аяныг Монгол Улсын Засгийн газрын хэрэгжүүлэгч агентлаг Усны газар, Монголын гидрогеологи, геоэкологийн холбоо, Галба-Өөш, Долоодын говийн сав газрын захиргаа, ШУТИС-ийн Геологи, уул уурхайн сургуулийн Геологи, гидрогеологийн салбар сургуультай хамтран хэрэгжүүлж байна.