2025 онд “Оюутолгой” компани Ойн газарт 32 ширхэг техник, тоног төхөөрөмж хандивлана

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг дэмжин “Оюу толгой” компани 100 сая мод тарих амлалтыг өгч, 2022 оноос энэхүү хөтөлбөрөө хэрэгжүүлж эхэлсэн юм.

Хөтөлбөрийн хүрээнд тогтвортой үйл ажиллагаагаа явуулж буй мод үржүүлгийн газруудын хүчин чадлыг нэмэгдүүлэх, ойн салбарын дэд бүтцийг хөгжүүлэхэд зорилгоор 1.5 тэрбум төгрөгийн өртөг бүхий нэн шаардлагатай 8 нэр төрлийн 80 ширхэг тоног төхөөрөмж хүлээлгэн өгөхөөс эхний 48 ширхэг тоног төхөөрөмжийг 2024 онд Засгийн газрын хэрэгжүүлэгч агентлаг Ойн газарт хүлээлгэн өгчээ.

2025 онд Ойн газарт нийлүүлэх 32 ширхэг техник, тоног төхөөрөмжийн нэр төрлийг оновчтой болгох, нийлүүлэх шаардлагатай тоног төхөөрөмжийн төрөл, зохистой байдлыг тодорхойлох зорилгоор “Оюу толгой” компани ойн мэргэжлийн байгууллагууд, Байгаль орчны газар, Ойн газар болон эрдэмтэн судлаачид болон олон талын төлөөлөлтэй хамтарсан хэлэлцүүлгийг 2025 оны 2 дугаар сарын 24-ний өдөр хийлээ.

Монгол Улсын ойжуулалт, ойн менежментийн чиг хандлагыг тодорхойлох, тулгамдсан асуудлуудыг шийдвэрлэх, хамтын ажиллагааг өргөжүүлэх зорилгоор “Оюу толгой” компани энэ төрлийн уулзалтуудыг 2025 онд сар бүр зохион байгуулж, ойн салбар болон хүрээлэн буй орчны бусад салбарууд болох усны менежмент, уур амьсгалын өөрчлөлт, хууль эрх зүй, цөлжилт зэрэг өргөн хүрээний байгаль орчинд тулгарч буй асуудлуудыг шийдвэр гаргах түвшний төлөөллүүд, салбарын мэргэжилтнүүд, судлаачид, уул уурхайн компаниуд нэг дор цуглаж, хамтран ажиллах, туршлага хуваалцах боломжийг бүрдүүлэх юм.

Өнгөрөгч гурван жилийн хугацаанд “Оюу толгой” компани нийт 20.5сая гаруй мод тарих болон ургуулахтай дүйцэх ажлыг амжилттай хэрэгжүүлжээ. Үүнээс ойжуулалтын хүрээнд 1.6 сая мод тарьж ургуулан, 19 сая модтой дүйцэх хэмжээний хөрөнгө оруулалтыг ойн салбарын дэд бүтцийг хөгжүүлэхэд чиглүүлээд байна. “100 сая мод” хөтөлбөрт тусгагдсан “Ойжуулалт, үрийн нөөц бүрдүүлэх, мод үржүүлгийн газрын дэд бүтцэд хөрөнгө оруулах” ажлын хүрээнд Монгол Улсын хэмжээнд иж бүрэн тоноглогдож, механикжсан нийт 10 мод үржүүлгийн газар байгуулахаар төлөвлөснөөс Өмнөговь аймгийн Ханбогд болон Цогт-Овоо сумдад тус бүр 250,000 ба 500,000 модны тарьц суулгац бэлтгэх хүчин чадалтай хоёр мод үржүүлгийн газрыг бүрэн ашиглалтад оруулсан юм.